أصوات

السمع.....نعمة من نعم الله سبحانه وتعالي

ماذا تسمع؟

الكثير والكثير والكثير من الاصوات

صوت يقول: بقولك ايه....الراجل ده لوحده...ومعاه فلوس كتير اوي.....وانت مش معاك اي حاجة....هو احسن منك في ايه؟.....اقتله.....اقتله وخد الفلوس.......يلا يا أخي مفيش حد شايفك

وصوت اخر: لا يا أبني... اوعي تعمل كده....واستمع الي ايات الله وهي تقول....ولا تقتلوا نفس بغير حق

واخر: بحبك ...بحبك....كلمة بقالي سنين عايز اقولهالك..... ...بقولك ايه من الاخر.....هاتي بوسة يابت

واخر:هو احنا علشان واقفين في بير السلم؟....عيب... انا بنت مؤدبة.....استني لما بابا وماما ينزلوا وابقي اطلعلي الشقة

صوت: اكسكيوز مي... ممكن اعرف الشوز ده بكام؟....فايف هندرد بوندز...اتس سو اكسبنسيف....ثانك يو...شكرا

واخر: خد اقولك يا بن عمي....الحتة دي عاملة كام؟....كام يابا....مش امين يابا...دي تمامها عشين جنيه.. ياجدع انت متعرفنيش ولا ايه.....دا انا اسامه حريقة نجم الصواريخ...اديني امينك...واديك اميني...ونقرب الامينين من بعض

انت مش راضي؟ ...طيب يا صاحبي....مسيري في يوم هاعلم عليك

صوت: انا خايف.....خايف مش عارف من ايه؟.....خايف من كل ال حواليا......خايف اتكلم...خايف اقول...خايف احس...خايف اشوف....خايف احب....خايف حتي اخرج من الباب

واخر: اكون أولا اكون.....تلك هي المسألة

صوت: ايوه العيش.....خمسة بجنيه يا عيش

واخر: والنبي ياعيد.... عايزين باتنين جنيه

صوت: ابين زين....اوشوش الودع....ابين زين

صوت: بولاق امبااااااااااااااااااابه..بولاق امبابة...بولاق امبااااااااااااااااااااااابة

واخر: دقي امبااااااااااااااااابه......دقي دقي دقي دقي امباااااااااااااااااااااااابة

صوت: العنب .... العنب ...العنب ...العنب....العنب

freeeeee....is all u gotta be......dreams dreams.......no one else can seeواخر

صوت: يابني انا معايا قرش...كفايه اوي كده....دي دماغنا هتنفجر....دا احنا هنروح النار يا معلم

واخر: انا مش عارفة هو عايز مني ايه....بيطاردني في كل حتة... وهو ياساتر... تقلة.... اوووووف.... ماعلينا.. شفتي حفلة تامر امبارح؟.....كان امور امور امور اوي....انا نفسي في واحد زي ده...مش الواد اللزقه الرخم ده

صوت: بيبو وبشير... بيبو وبشير...بيبو والجون...بيبو وبشير.....بيييييييييبو والجون

صوت:اهلا بكم في برنامج حوارات وندوات ...وضيفنا اليوم...هو الاستاذ... عز الدين الحسيني...استاذ الصرف الصحي ...وهيكلمنا اليوم عن مشاكل العولمة وعلاقتها بالبكبورت المفتوح

صوت: صبح صبح ياعم الحاج...ايه يا فالنتينو... لقيت وزيتن يهود جوه وسط العراقيين...رحت جايب رقابيهم

صوت: ياعالم ارحمونا بقي... انتو هنا موظفين في الدوله...يعني شغالين لخدمتنا... كفرتونا....يلعن ابوكو...لابو دي بلد

صوت: كل واحد يقف في الطابور وميتكلمش خالص....انت يا استاذ انت وهو انتو واقفين في منطقة تجنيد يعني منطقة عسكرية..مش واقفين مع بعضكم في الشارع... كل واحد يحط جزمة في بوقه...والا والله...هالبسه 3 سنين...حتي ولو هياخد تأجيل

صوت: انا ياعمي جي انهاردة...علشان اطلب ايد بنت حضرتك ... الانسة مني..... وانا والله هاحطها في عنيا

وصوت: امشي يابنت الكلب...انا كنت اتعميت ولا اتجننت...الله يلعن ابو الجواز...لابو ال عايز يتجوز

وصوت: مياو ...مياووووووووووو.مياوووووووووووو

وصوت: هو هو هو هوهو هو هو هو هو هو

وصوت حمار بينعر... وصوت مكنة بتدور

وصوت كلاكس عربية.... وصوت واحد بيشتم

وصوت واحدة بتصوت علشان العيال مطلعين عنيها

وصوت حنفية المايه البايظه وهي بتنقط

وصوت اللبانة ال بند غها دلوقتي

وصوت وصوت وصوت وصوت

ومليون صوت بسمعه

فيه ال عاوز اسمعه وده قليل....وفيه ال مش عاوز اسمعه وده كتير

لكن فيه صوت واحد نفسي اسمعه

صوت تسمعه كل خلية في جسدي الا خلايا اذني

وتقوله كل خلايا جسدي الا خلايا لساني

صوت يتحرك في جوفي.. يعلو ويشتعل ويحرقني تماما

لذا قررت ان انساه...قررت ان لا اتذكره

مع انه اكترالاصوات التي اريدها وبشدة

. صوت يقول

من انا؟

حاولت كثيرا ان اجيب....لم تفلح محاولاتي

حاولت كثيرا جدا ان اخرج هذا الصوت حتي لو مرة...لم تفلح محاولاتي

لذا قررت ان اكتبه هنا......من انا؟

علي الاقل الان اكتبه

.ولكني اقسم بالله...ان اقوله واقسم ان اجيب عليه

سأملأ الدنيا بالسؤال.... وسأملأ الكون كله بالاجابه علي هذ ا السؤال

من انا؟

اعدكم ان اقوله واعدكم ان اجيب عليه

واتمني ان تفعلوا الشئ نفسه

ان تسألوا؟

وان تجيبوا

والسلام عليكم ورحمة الله وبركاته